The Hallgrimsson´s

pictures from Oxford

2010-11-05T12:30:00.001-06:00

Pictures for those who live abroad..

2010-10-31T10:41:00.008-06:00

The Hallgrimsson´s have moved back to Iceland. But the head of the family is now in Oxford getting himself a new degree!

Well for him and all our friends living abroad here are some pictures from our daily lives.

Have fun

Styttist í heimferð

2009-11-05T07:10:00.004-06:00

Héðan er allt gott. Við höldum áfram að pakka og gera okkur klár í fluttning. Gámurinn kemur 20 nóvember.
Það var gaman á Hrekkjavöku. Við fórum til Kötu og Hjalta og krakkarnir fengu heilmikið sælgæti!
Ég setti inn nokkrar myndir og bestu kveðjur

Október

2009-10-18T21:31:00.003-06:00

Héðan er allt fínt, haustið komið og hrekkjavaka nálgast. Kára finnst svo gaman þessa dagana, hann vill helst skreyta allt húsið með leðurblökum og draugum. Hann og Hallgrímur eru búnir að velja sér búninga, Hallgrímur ætlar að vera sjóræningi en Kári Clone Trooper(úr star wars). Við erum búin að kaupa grasker, þau seljast svo hratt, gæti orðið skortur!

Á þriðjudaginn ætlum við svo að fara í graskersleiðangur í sveitina, það klikkar aldrei.

Benedikt og Halldór kepptu á síðasta X Country mótinu um helgina. Við fórum til höfuðborgarinnar Des Moines, það var fylkismót.

Fyrir viku síðan fórum ég og börnin ásamt Fionu, Andy og börnum í hellaferð í Maquoketa. Ég setti inn myndir frá ferðinni. Bestu kveðjur og senn styttist í heimferð..

Afmæli hjá Hara og Hallgrími

2009-09-29T06:16:00.004-06:00

Þá líður september. Það er búið að vera meir en nóg að gera. Koma húsinu á sölu og halda afmælisveislur. Hallgrímur hélt upp á 6 ára afmæli sitt í Par-tee-zone. Það var vel heppnað og hann fékk mikið af flottum gjöfum.

Héðan er allt gott, Kári og Hallgrímur halda áfram að æfa fótbolta, Hallgrímur spilar á píanóið og æfir sig fyrir tónleika. Ragnheiður er alltaf sama skottan, fer um allt með bros á vör. Fyrsta tönnin hefur litið dagsins ljós!

Bestu kveðjur héðan

Sunnudagur

2009-09-13T06:58:00.005-06:00

Héðan er allt gott. Við erum á fullu að undirbúa húsið fyrir sölu og fjölskylduna undir flutninga. Það gengur ágætlega að pakka og stefnum við á að hafa bílskúrssölu næsta laugardag.

Fjölskyldan eyddi síðustu helgi ásamt Kötu og Hjalta í Suður-Dakóta hjá Önnu Margréti, Örvari og börnum. Það var góð helgi og á myndinni má sjá öll börnin nema þann elsta og þá yngstu:-)

Á eftir er Hallgrímur að fara í sinn fyrsta sundtíma. Hann og Kári eru líka byrjaðir í fótbolta. Halldór og Benedikt hlaupa á hverjum degi í X-Country, þeir eru búnir að keppa á einu móti og gekk ágætlega. Hér er yndislegt haustveður alla daga hitinn um 29 gráður.

Bestu kveðjur frá öllum

Hallgrímur skólastrákur.

2009-08-24T08:16:00.003-06:00

Hallgrímur er svo ánægður í skólanum, honum fannst algjör óþarfi að hafa helgarfrí. Í dag á að vera tónlistartími og ferð á bókasafnið.
Benedikt og Halldór eru líka byrjaðir í skólanum. Þeir fara í X Country og eru þegar byrjaðir að æfa.
Þessi vetur verður þó frábrugðinn öðrum þar sem þetta er síðasti veturinn okkar hér. Það er skrítið að hugsa til þess að þrjú ár séu liðinn síðan við komum.
Set inn myndir og bestu kveðjur

Ágúst

2009-08-08T07:23:00.002-06:00

Hér eru bræðurnir á leið í bláberjatýnslu. Við skemmtum okkur vel og týndum nóg í smá sultu handa mannskapnum. Steinunn Edda og Eygló komu með okkur.
Veðrið er alltaf jafn gott, eðlilegur hiti og notalegt. Nú bíðum við spennt eftir komu Lalla og fjölskyldu ásamt mömmu. Þau koma til okkar á fimmtudaginn.
Ég set inn nýjar myndir í dag. Bestu kveðjur.

RAGBRAI

2009-07-23T21:04:00.002-06:00

Ferðalagið til Minneapolis gekk vel. Benedikt og Halldór komnir heim, systkinum sínum og foreldrum til mikillar gleði.
Hari á eftir viku í skólanum, þá tekur við smá frí áður en síðasta önnin byrjar. Á morgun ætlar hann að taka þátt í Ragbrai / www.ragbrai.com Þeir Andy ætla að hjóla 70 mílur!
Bestu sumarkveðjur frá miðvestrinu

Sumar og sól

2009-07-15T10:44:00.004-06:00

Héðan er allt gott að frétta. Ragnheiður orðin 6 mánaða og byrjuð að fá graut í kvöldmatinn. Hún er einnig farin að skríða um allt og finnst flest sem ekki má skemmtilegt. Hallgrími og Kára finnst hún ótrúlega fyndin og sérstaklega þegar hún frussar grautnum útúr sér og yfir mömmu sína. Hallgrímur er núna á námskeiði með krökkum sem eru að byrja í skóla í haust. Hann er ánægður með það ásamt að sinna píanóinu. Kári minn skottast með mömmu sinni og litlu systur sem yfirleitt er ekkert svo leiðinlegt. Annars erum við öll farin að hlakka til komandi mánudags, en þá koma Halldór og Benedikt heim til okkar. Það verður alveg ótrúlega gaman.
Núna er amma Ragnheiður í heimsókn hjá okkur, en hún fer daginn eftir að tvíburarnir koma heim.
Við skemmtum okkur vel á fjórða júlí. Fórum í grill til Andy og Fi, kíktum svo á flugelda.
Myndin af Hallgrími og Kára er tekin í göngu á Woodpecker trail hérna í nágrenninu. Það var orðið svolítið heitt í skóginum, set inn nokkrar myndir.

Nýjar myndir

2009-06-29T09:22:00.004-06:00

Þá er komin mánudagur. Við höfum það fínt. Hari er í skólanum, Bensi og Halldór komnir til Íslands og ég og börnin mín þrjú höfum það notalegt heima.
Veðrið er voða gott, fínn hiti núna ekki eins heitt og fyrir viku! Litla daman er farin að velta sér í hringi og ýta sér áfram á gólfinu. Mjög dugleg og kröftug.
Minneapolis ferðin okkar gekk vel, fyrir utan smá umferðatafir og hvirfilvinda. Hallgrímur og Kári fóru aðeins í legobúðina í MOU og hittu líka Spongebob og Patrik, sem var alveg frábært.
Setti inn myndir frá heimsókn Hallgríms, Ragnheiðar og Ásgeirs í júní og af börnunum. Bestu kveðjur til allra.

þjóðhátíð og ferðalag

2009-06-19T08:46:00.006-06:00

Gleðilega þjóðhátíð.
Við héldu daginn að sjálfsögðu hátíðlegan og buðum þjóðræknum íslendingum í grill. Það var mjög gaman eins og vanalega, krakkarnir skelltu sér aðeins í laugina og svo voru grillaðar pulsur og hamborgarar.
Þau Hallgrímur, Ragnheiður og Ásgeir fóru fyrir viku, það var mjög góð heimsókn og margt skemmtilegt gert. Á morgun leggja svo Halldór og Benedikt af stað til Íslands. Þeir verða til 20 júlí. Við ætlum að keyra þá til Minneapolis og vera þar eina nótt. Alltaf gaman að kíkja þangað.
Hari er byrjaður í skólanum og við hin förum að skokka, í laugina eða bara einhvern garðinn að leika okkur. Bestu kveðjur frá Bambagötu og ætli ég setji ekki inn nokkrar myndir.

Gestir á Bambagötu

2009-06-05T20:39:00.005-06:00

Þá erum við mæðgur komnar aftur heim. Ferðin gekk mjög vel og var ótrúlega gaman að hitta alla. Hér er Ragnheiður hjá langafa Haraldi.

Núna eru Ragnheiður, Hallgrímur og Ásgeir komin í heimsókn og erum við að njóta sumarblíðunar saman.

Benedikt og Halldór eru búnir með skólann og gekk vel hjá þeim. Það styttist svo í að þeir fari til Íslands að hitta pabba sinn og frændfólk.

Bestu kveðjur frá okkur hér og takk fyrir góðar móttökur á Íslandi.

Vorið er komið ....

2009-05-06T11:06:00.007-06:00

Héðan er allt gott. Ragnheiður tengdamamma er hjá okkur og ætlar að vera út mánuðinn. Það er ansi gaman og notalegt. Hún er að vinna í sínu námi, eins og drengirnir mínir stóru og kallinn. Öllum gengur vel. Hari á næstu viku eftir af skólanum og þá er þessi önn búin.

Litlu herrarnir mínir eru sprækir eins og vanalega. Kári fékk gat á höfuðið á sunnudaginn og þurfti að sauma fjögur spor. Hann stóð sig einstaklega vel og finnur ekkert fyrir þessu. Þeir bræður voru að byrja í fótbolta fyrir yngir kynslóðina, Tiny Tot Soccer, voða gaman, þeir eru þó ekki í sama liði, sem er ágætt.

Ragnheiður yngri er 4ra mánaða í dag. Við erum að fara í skoðun á eftir, hún er einstaklega ljúf og góð stúlka, sefur alla nóttina og vaknar með bros á vör. Bestu kveðjur

Gestir komnir og farnir

2009-04-16T11:16:00.003-06:00

Héðan er allt gott, grillið komið á pallinn og fjölskyldan farin að njóta útiverunar í 16 stiga hita.

Það var alveg frábært að fá Kára, Eyrúnu og Þór í heimsókn. Frændurnir skemmtu sér vel saman og hlakka mikið til þess að hittast aftur.

Setti inn myndir og allir biðja að heilsa.

Skyrgerð

2009-03-31T20:49:00.003-06:00

Hér er hann Hallgrímur minn á leið í píanó tíma. Hann er búinn að fara í þrjá tíma og finnst gaman.
Annars er allt gott af okkur. Hari er að búa til skyr. Það gengur mjög vel og bragðast einstaklega vel.
B og H eru byrjaðir í frjálsum íþróttum eftir skóla (track and field), nóg að gera hjá þeim. Fyrsta mótið verður núna 7 apríl.
Um páskana fáum við heimsókn frá London, þau Kára, Eyrúnu og Þór. Hér eru allir orðnir mjög spenntir, það er orðið svo langt síðan við hittumst. Ég set inn nokkrar nýjar myndir og takk fyrir góðar kveðjur.

Laugardagskvöld

2009-03-21T22:17:00.004-06:00

Þá eru drengirnir sofnaðir og stúlkan, við vorum að koma frá Kötu og Hjalta, fengum grillaða hamborgara. mmmmm ekkert betra! Hér er vorið komið, allvega hitalega séð. Gróðurinn er nú ekkert sérstaklega farinn að taka við sér en það kemur.

Ferðalagið gekk vel, þó það hafi verið pínu spæló að komast ekki á bretti eða skíði fyrir eldra settið. Það gerist seinna. Við fórum í heitapottinn, göngu um skóginn og á flott safn við Mississippi ánna, sem sýndi okkur lífið í ánni. Einnig skelltum við okkur í göngu á degi heilags Patreks, svona til heiðurs Íranna í USA. Á kvöldinn sátum við við varðeld og á myndinni má sjá Hallgrím borða smores sem er marshmallow hitað í eldi svo sett á hafrakex ásamt bita af súkkulaði. Við hlustuðum á sléttuúlfa ýlfra, froska vakna eftir vetrardvala og uglur í makaleit.

Núna er verið að vinna sig niður í rútínu aftur eftir gott vorfrí. Bestu kveðjur.

Þorri

2009-03-10T09:32:00.005-06:00

Héðan er allt gott. Hari, Bensi og Halldór eru í skólanum, Hallgrímur og Kári eru að kubba og Ragnheiður sefur úti í vagni.

Febrúar mánuður var ansi góður. Ragnheiður kom í heimsókn frá London, það var alveg frábært að fá hana og Kári hélt upp á fjagra ára afmæli sitt sem tókst vel.

Á laugardaginn héldum við Þorrablót hér á Bambagötu, hangikjöt, harðfiskur og hákarl ásamt þrumara og síld, skyrkaka og kleinur í eftirmat. Algjört lostæti og svo gaman hjá öllum.

Um næstu helgi fer fjölskyldan í vorfrí. Stefnan verður tekin á Galena, http://www.galena.com/ sem er bær í Illinois. Þar erum við búinn að leigja hús í fjóra daga ásamt vinafólki okkar. Við erum spennt að fara, góð tilbreyting frá hinu daglega amstri!

Bestu kveðjur, set inn nokkrar myndir og takk fyrir gjafirnar handa Ragnheiði, hún er algjör prinsessa sem á 12 kjóla!

Tannálfurinn kom!

2009-02-17T12:07:00.003-06:00

Hér er hann Hallgrímur minn búinn að missa fyrstu tönnina sína, hann missti svo aðra í morgun. Þetta gerist svo hratt að vonandi verður hann ekki orðin tannlaus í enda vikunnar!
Annars er allt gott af okkur, börnin dafna vel, daman er alltaf dugleg að borða og sofa. Hún lætur aðeins hafa fyrir sér en það eiga líka dömur að gera.
Á föstudaginn snjóað ansi mikið, með þeim afleiðingum að það varð ofboðslega hált og mikil fjöldi bíla lentu í árekstri og vandræðum hér í brekkunni fyrir framan húsið. Enginn slasaðist þó sem betur fer.
Á morgun kemur Ragnheiður í heimsókn, við erum öll mjög spennt að fá hana til okkar.
Bestu kveðjur til allra og ég setti inn nokkrar nýjar myndir.

Kári sjóræningi

2009-01-27T19:03:00.005-06:00

Héðan er allt gott, drengirnir komnir í háttinn. Búnir að borða súrmjólk með ávöxtum og nýbakað brauð.
Það er alveg ótrúlegt hvað hér ætlar að snjóa og vera kalt dag eftir dag. Við höfum ekkert getað verið úti að ráði í ansi langan tíma.
Á morgun er Fiona búin að bjóða okkur sem heima erum í hádegismat. Hún er Áströlsk garðyrkjukona, ansi skemmtileg, gift Iowa manni.
Ég var að setja inn myndir frá desember, af drengjunum á jólunum og af dótturinni. Við biðjum að heilsa og óskum Ragnheiði til hamingju með daginn.

Komnar heim

2009-01-12T13:52:00.003-06:00

þá er hún fædd litla daman okkar. Alveg ótrúlega ljúf og góð. Drengirnir eru ansi ánægðir með hana og hún með þá. Hún sperrist öll upp þegar hún heyrir í þeim, en grætur og heimtar mat þegar hún heyrir í mömmu sinni.
Hér er hún á myndinni, strax á fyrsta degi, umvafin karlmönnum. Það er ekki leiðinlegt að hafa þetta glæsilega föruneyti til að hugsa um sig.
Ég set inn myndir frá 6 jan og síðastliðinni viku. Hafi þið það öll sem allra best og takk fyrir hlýjar kveðjur til okkar hér.

Gleðilegt ár

2009-01-05T21:41:00.003-06:00

Hér er lokaundirbúningur í gangi. Drengirnir komnir í pössun og við Hari búin að eiga notalega kvöldstund, tvö saman! Á morgun verðum við svo orðin sjö.

Biðjum að heilsa heim og takk fyrir hlýjar kveðjur í okkar garð.

Gleðileg jól

2008-12-26T23:10:00.003-06:00

Þá er annar í jólum senn liðinn. Hér eru allir ansi sáttir, aðfangadagur gekk vel, kalkúnninn var svo góður, fullt af pökkum og góð stemmning. Jóladagur var einnig alveg eins og maður vildi, notalegt og rólegt fram eftir degi, elduðum svo nautalund í rauðvínssósu um kvöldið voða gott.

Annars var svo kalt í gær að engan langaði út. -20 gráður, núna er aftur á móti 8 stiga hiti og svo mikil þoka að maður sér ekki næsta hús.

Á morgun fer fjölskyldan í afmæli hjá henni Steinunni Eddu, sem varð tveggja þann 13 des. Fyrir viku fórum við á jólaball hjá Önnu Margréti og Geir. Giljagaur mætti og var bara ansi gaman.

Við hér á Bambagötu þökkum kærlega fyrir okkur. Það var ansi ánægjulegt að fá alla pakkana frá Íslandi og kveðjurnar.

snjóar og snjóar

2008-12-17T15:37:00.004-06:00

Hér er ansi fallegt um að litast. Allt í snjó og frostið um -15 gráður. En það er ekki ROK sem er stærsti kosturinn;-)

Á myndinni má sjá hvað gerist þegar byrjar að snjóa og frostið er svona mikið. Það frýs allt jafn óðum og hálkan er ótrúleg. Þessi árekstur varð í gær á I-80 sem er aðalþjóðvegurinn hér í gegn.

7 trukkar lentu í vandræðum og tveir fólksbílar.

Núna bíðum við Hallgrímur og Kári eftir skólabílnum sem skilar H og B heim. Hari fer í þriðja prófið á eftir og svo það síðasta á föstudag. Þá er þessari önn lokið og tvær eftir.

Um helgina fékk ég leiðbeiningu í Quilt gerð og saumaði teppi handa væntanlegum fjölskyldumeðlimi. Nú er bara að fjárfesta í saumavél og gera fyrir restina af fjölskyldunni!

Baráttukveðjur

2008-12-08T10:30:00.003-06:00

Hér erum við hjónin að spila á þakkargjörð. Það tókst ansi vel og var mjög gaman hjá okkur. Núna eru allir á fullu að klára skólana sína áður en jólafríið byrjar. Við eigum tvær vikur eftir og svo bara Kósýheit par exelans eins og Baggalútur syngur svo hugljúft. Það væri nú ekki leiðinlegt að vera á leiðinni til Íslands yfir jólin, en við sjáumst síðar kæru vinir og vandamenn.

Húsfrúin á fjörutíu ára afmæli í dag, er að verða fimm barna móðir og snillingur í stærðfræði, loksins. Ekki verra að gorta sig aðeins af því. Bestu kveðjur til allra frá okkur á Bamba...

Allir komnir í frí

2008-11-25T22:51:00.002-06:00

þá er hið langþráða frí komið hjá öllum í fjölskyldunni. Við ætlum að hafa það ósköp notalegt hér heima. Höldum Þakkargjörðar boð á fimmtudag, kalkúnninn er kominn í hús og nú er bara að afþýða!

Ég setti inn myndir af bumbunni. Bestu kveðjur.

Afslappaður sunnudagur

2008-11-09T20:06:00.004-06:00

þá er dagur að kveldi kominn. Ég var að enda við að setja inn myndir frá Októbermánuði.

Við fengum góða gesti til okkar á föstudaginn, Phil og Christine komu ásamt Jackie. Við áttum notalega kvöldstund saman. Í gær fór svo öll hersingin í mat til Önnu Margrétar og Geirs, það var einnig mjög skemmtilegt, Hjalti og Kata voru líka og það má lengi skrafa um Ísland og það sem betur eða verr mætti fara þar.

Annars er kuldaboli mættur til Iowa, vetrarflíkur komnar úr dvala og gaman, gaman.

Bestu kveðjur

Miðvikudagur í miðvestrinu

2008-11-05T11:31:00.004-06:00

Obama tókst það, bensínverðið er komið undir 2 dollara og kannski bara allt á uppleið í usa!

En hjá okkur á Bambagötu er allt fínt. Haustið lætur vita af sér með endalausum laufum fjúkandi um allt, þvottabirnir í vegakantinum og nóg af dádýrum á röltinu á kvöldin. Ég keyrði yfir skúnk um daginn, ekki á hann sem betur fer hann var þegar dauður, og lyktin var ólýsanleg, ojjjjj það mátti engu muna að ég kastaði upp.

Núna eru rólegir dagar fram að miðsvetrarprófum og þakkargjörð. Það gekk vel á Hrekkjavökunni og allt fljótandi í sælgæti, Hallgrímur fékk sápur í einu húsi og var hinn ánægðasti því þá gæti hann þvegið sér um hendurnar eftir allt átið;-)

Húsmóðirn fer í skoðun á eftir, það eru komnar 30 vikur og allt gengur vel. Saknaðar kveðjur til íslands...

Skólaball

2008-10-25T10:05:00.005-06:00

Halldór og Benedikt fóru á skólaball í gær. Það var hrekkjavöku ball og mjög gaman hjá þeim.

Helgarfrí

2008-10-19T19:05:00.003-06:00

þá er október hálfnaður. Það er óhætt að segja að tíminn líður hér í Coralville. Þetta var fínasta helgi. B og H kepptu í X Country og gekk ágætlega, við fórum í góðan bíltúr og kíktum á Mesquaki Casino, sem er ekki langt héðan, slepptum því þó að gambla! Í dag er maður svo búin að sitja yfir stærðfræðinni meðan þeir litlu skemmtu sér við að horfa á Dýrin í Hálsaskógi. H og B eru að fara í samræmd próf í vikunni, spennandi.

Biðjum að heilsa heim og takk fyrir kveðjurnar.

ps. væri frændfólk í Hollandi kannski til í að senda okkur link á heimasíðu sína?

Sunnudagsmorgun

2008-10-05T08:08:00.005-06:00

Á laugardaginn fyrir viku fórum við Kata með krakkana að sjá Disney on Ice. Í gær fórum við Hari að sjá Kathy Griffin, uppistandara, hún var alveg frábær. Núna er sunnudagsmorgun og allir að skríða á fætur, nema þeir yngstu sem virðast aldrei þurfa að sofa út. Þeir ganga um húsið sem læknar og viðgerðamenn eða Star Wars persónur. Ætli ég fari ekki að gefa þeim að borða. Bestu kveðjur og til hamingju með daginn Bensi Blöndal.

Hallgrímur fimm ára

2008-09-28T16:32:00.001-06:00

Þá er Hallgrímur orðin fimm ára, kominn með skegg svakalega flottur. Hann hélt veislu í gær, byrjaði þó daginn á að fara með Kára, Ingu Bryndísi, Kolbrúnu og Birtu á Disney on Ice. Voðalega skemmtileg sýning með persónum úr Disney heiminum, svo hélt hann veislu seinna um daginn sem tókst prýðilega og var ansi gaman hjá okkur. Hann fékk fullt af fínum gjöfum og er svo lukkulegur. Nú er tími hrekkjavökunar að byrja, það þarf að finna sér búninga og kannski kíkja á einhvern graskersbæinn til að leika sér. Þetta er skemmtilegur tími hérna og sérstaklega þegar haustveðrið er svona yndislegt.

Ég set inn nýjar myndir og takk kærlega fyrir kveðjurnar, við biðjum öll að heilsa héðan:-)

Afmæli

2008-09-20T23:26:00.003-06:00

Bóndinn á afmæli á morgun. Hér er hann með drengjunum í dýragarðinum. það var ansi heitt þann daginn!

Annars gengur skólagangan vel, nóg að gera hjá öllum. Bensi og Halldór eru búnir að keppa þrisvar sinnum í Cross Country. Kári og Hallgrímur syngja Buenos dias, Buenos dias, como estas, como estas........... ansi skondið.

Það eru þrír og hálfur mánuður í nýjasta fjölskyldumeðliminn, gangan gengur vel:-) Allar dúkkur heimilisins eru nú í fullri notkun, kári er mikið að æfa sig. Hann er nefnilega líka ófrískur, mun eignast barn sem kemur út um stóru tá og á að heita Narruto. Hmmm. Bestu kveðjur héðan úr yndislega haustinu í Iowa.

Laugardagskvöld

2008-08-30T21:17:00.003-06:00

Við fórum út að borða í kvöld. Hallgrímur átti hugmyndina og tilkynnti okkur að við ættum að þakka honum fyrir matinn, sem og við gerðum að sjálfsögðu. Hér er ennþá ótrúleg veðursæld, fyrsti leikurinn í Háskóla-ameríska-fótboltanum var í dag. Okkar lið vann. Go Hawks! Nú er bara spurning um að fara að koma eldra settinu í háttinn og að við Haraldur setjumst aðeins út. Set inn örfáar myndir. Bestu kveðjur heim

Fyrsta skólavikan búin

2008-08-22T17:44:00.004-06:00

þá eru þeir bræður búnir með fyrstu vikuna sína. H og B voru mjög ánægðir, það er þó ansi mikið að gera, heimalærdómur og æfingar í Cross Country eða víðavangshlaupi. Fjórar æfingar í viku í einn og hálfan tíma í senn, langir dagar framundan! Stubbarnir mínir eru líka byrjaðir á fullu, eru í tónlist og spænsku á fimmtudögum og í myndlist á þriðjudögum, fyrir utan annað hefbundið Montessori starf. Móðirin þarf nú að fara að finna sér einhver morgunverkefni, jóga og sjálfboðavinna eru svona efst á listanum. Allavega eitthvað annað en hin hefðbundnu heimilisstörf !

Halldór og Benedikt eru með næturgesti, það er búið að panta pizzur og ætla þeir að hreiðra um sig í kjallaranum með snakk og hryllingsmynd:-) Við Hari ætlum að skemmta yngra settinu. Biðjum kærlega að heilsa heim í handboltastemmninguna

Ps myndin er af Freight Train sem er stærsta svín Iowa aðeins,1265 pund eða 573,79 kg.......

Fullkomið veður ...

2008-08-17T21:23:00.003-06:00

Það bara gæti ekki verið betra. Við strákarnir fórum í sund í morgun. Síðan var farið og klárað að versla skólabækur. Á morgun eru svo herramennirnir fjórir búnir með sitt sumarfrí, og þriðja skólaárið í Iowa byrjar. Þeir eru allir alveg ágætlega stemmdir, væru að sjálfsögðu alveg til í að hangsa aðeins lengur. Allavega þeir stærri.

Við Hari verðum svo saman í fríi viku lengur. Ferðalagið gekk mjög vel og pössunin líka. Það var alveg ótrúlegt hversu vel var tekið á móti okkur hvar sem við komum. Keyrslan var mikil með stoppum á ýmsum stöðum: Coralville, Minneapolis, Grand Forks, Winnipeg, Hecla Island, Mountain, Grand Forks, Sioux Falls og svo endað í Coralville á Bambagötu.

Bestu kveðjur og einhverjar myndir settar innnn

Mánudagur í miðvestrinu

2008-07-28T13:47:00.003-06:00

Þá erum við orðin sex að nýju. H og B komnir heim, brúnir og sællegir eftir dvöl á Íslandi! Það var gott að fá þá aftur heim.

Hér er allt ósköp rólegt, Hari klárar skólann á fimmtudag, yngra settið er komið í frí frá sínum skóla og þeir eldri eru bara að njóta dagsins.

Það fer að líða að gestakomu. Hallgrímur afi mætir hér á föstudaginn og svo förum við Hari á móts við Baggalúts menn og konur á laugardeginum. Þetta verður spennandi frí, keyrum til Canada og tökum rúnt um nokkur fylki í USA, endum svo í sveitasælunni hér á Bambagötu.

Bestu kveðjur og ég vona að andleysi frúarinnar fari nú að batna.

Júní

2008-06-23T19:00:00.005-06:00

Við erum fjögur í kotinu, eldra settið er á Íslandi að hitta pabba sinn, ættingja og vini. Kári og Hallgrímur voru að byrja á leikskóla og finnst voða gaman að vera saman. Þeir eru búnir að vera rúma viku og gengur mjög vel. Afi Hallgrímur kom að heimsækja okkur í maí, það var mjög góð heimsókn. Hann kemur svo aftur í ágúst.

það er sérstök stemmning í bænum núna þegar flóðin eru, árnar eru þó í rénun, en enn þá eru götur sem ekki er hægt að keyra og það er alveg ótrúleg hreinsun sem á eftir að fara fram. Það má þó ekki fjarlægja sandpokana strax þar sem ekki þykir ólíklegt að það flæði aftur. Við vorum þó heppnari en nágrannabær okkar, Cedar Rapids, þar sem yfir hundrað húsaraðir fóru í kaf.

Núna erum við að njóta sumarsins, veðrið er yndislegt, búin að setja niður grænmeti og krydd. Vínberjatréin hafa tekið ótrúlega vel við sér og ætli ég nái ekki að klára að verja pallinn áður en næsta heimsókn verður. Kalli og Stefanía eru að koma til okkar með krakkana núna á föstudaginn og ætlum við að hafa það notalegt hér í veðurblíðunni.
Vona að ekki verði langt í næstu skrif og set inn nokkrar myndir frá maí og júní.

Bræður að keppa

2008-05-13T15:58:00.003-06:00

Students Compete at City High:
Wickham sixth-grader Halldor Karlsson, 11, looks over at the cheering crowd as he prepares to run in the three-legged race with his twin brother, Benedikt, at the Iowa City Elementary School Track Meet on Monday, May 12, 2008, at City High School.
Þeir unnu að sjálfsögðu!
Þetta var ansi skemmtilegt, fjórir grunnskólar kepptu og var mikil stemmning. Við mamma, Hallgrímur og Kári létum þetta ekki framhjá okkur fara og sátum galvösk í stúku og hvöttum Wickham nema áfram.
Núna er Hari í lokaprófum, öðru skólaári senn að ljúka. Mamma kveður okkur á föstudaginn og Hallgrímur, tengdapabbi, kemur í næstu viku. Hann á reyndar afmæli í dag eins og hún mágkona mín Anna Kristín, til hamingju bæði tvö með daginn.

Komin heim

2008-05-05T14:40:00.003-06:00

Ferðin til St. Louis gekk vel. Hallgrímur og Kári voru góðir ferðafélagar og náðu ágætis sambandi við heimilisfólk og aðra ættingja. Við skoðuðum borgina og sáum Bogann stóra, listasafnið, Busch leikvanginn, þar sem hafnarbolti er spilaður, fór reyndar á leik með Cardinals á mánudagskveldinu. Völlurinn tekur 46000 og er mjög góð stemmning. Við kíktum að sjálfsögðu aðeins í búðir líka.
Núna erum við að njóta þess að hitastigið hefur loksins hækkað almennilega og við því komin í stuttbuxurnar. Í gærkveldi grilluðum við og borðuðum úti. það var ansi notalegt. Nú fer að styttast í heimferð mömmu. Aðeins tvær vikur eftir. Um næstu helgi ætlum við til Des Moines, það er fótbolti hjá þeim stóru. Bestu kveðjur og innilegustu hamingjuóskir til Haraldar með árin níutíu.

Saint Louis

2008-04-28T08:19:00.003-06:00

Ta erum vid mamma maettar til St Louis. Vid erum bunar ad vera her i tvo daga. Forum i bod hja Eric og Wendi i gaer, tar hittum vid fullt af aettingjum sem var mjog gaman. Serstaklega tar sem vid hofdum ekki sed folkid i rumlega tuttugu ar. Tessir aettingjar eru allir fra Canada, vestur-islendingar, skyldir modur minni i foduraett. Nuna erum vid a leid i morgunmat hja Eric, sidan aetlum vid ad skoda borgina betur. Tad sem vid hofum sed er ansi fallegt, her er vorid komid, to tad se svolitid kalt ennta, svona midad vid vanalega. Trein eru otruleg. Eg set inn myndir tegar heim kemur, vona ad allir hafi tad sem best. Afsakid, engnir islenskir stafir!

Vorverkin byrjuð!

2008-04-15T20:00:00.000-06:00

Nú er hún mamma mætt og drengirnir eru mjög ánægðir þar sem henni virðist aldrei leiðast að dekstra þá í einu og öllu.
Við erum búnar að hafa það fínt undanfarið, við förum í stutta bíltúra, kíkjum í búðir og löbbum um. Svo græðum við Hari að sjálfsögðu á heimsókninni, þar sem við getum kíkt út að kvöldi til án barna og heimsótt vini. Við fórum í ansi gott partý hjá Cristine og Phil um helgina, það langt síðan við höfum dansað svona mikið!
Ég var stöðvuð af lögreglu í fyrsta skipti á ævinni, fyrir of hraðan akstur. Lögregluþjónninn var almennilegur og sleppti mér með aðvörun:-)
En núna er helst á dagskrá að koma garðinum í almennilegt horf og snitta að pallinum og hurðunum. Það er alltaf nóg að gera á stóru heimili. Benedikt og Halldór eru að vinna skemmtilegt skólaverkefni heima, annar er að byggja hof Apollo og hinn að gera styttu af Seifi. Smíðin gengur vel og það stefnir í að verkin verði mjög flott hjá þeim. Ég setti inn nýjar myndir

miðvikudagur

2008-04-02T08:21:00.003-06:00

Þegar við vöknuðum í morgun var frost í jörðu, allt hvítt, heiðskírt og ótrúleg stilla. Yndislegt veður. Við Kári erum búin að skila af okkur skólafólkinu og erum á leið til Önnu Margrétar í göngu. Það verður hressandi.

Hari er í prófum þessa vikuna, Bensi og Halldór eru nýbúnir með útilífsskólann, sem stóð yfir alla síðustu viku og var rosalega skemmtilegur. Núna er útiboltinn að byrja hjá þeim, loksins, það hefur ekki verið hægt að spila vegna bleytu.

Við erum bara ósköp róleg þessa dagana, kannski pínulítið spennt þar sem amma Gunna er að koma til okkar á föstudaginn. Það verður nú ansi skemmtilegt. Meira seinna.....

Gleðilega páska

2008-03-24T10:05:00.003-06:00

Vorfríið er búið og drengirnir allir mættir í skólann. Við höfðum það ágætt í fríinu okkar. Vorum mest heima, máluðum egg, fórum í göngutúra, kíktum á leikvöllinn og fórum á bókasafnið. Þar þurftum við þó að flýta okkur út þar sem eldvarnarkerfið fór í gang, en ekkert alvarlegt kom út úr því. Við náðum þó að sjá slökkviliðsbíl, sem Kára fannst ansi skemmtilegt. Á föstudaginn grilluðum við þessa líka fínu nautasteik og komumst í smá vorskap, en svo fór bara að snjóa á okkur daginn eftir!
Núna erum við Kári að fara að sækja Hallgrím á leikskólann. Ég er búin að setja inn nýjar myndir, njótið vel og bestu kveðjur.

Vorfrí

2008-03-17T09:07:00.004-06:00

Þá er fjölskyldan í fríi þessa vikuna. Við vitum nú ekki alveg hvað við eigum af okkur að gera, veðrið er ekki eins gott og við vonuðumst til. Snjórinn er næstum farinn, en það er ansi kalt ennþá.

Hari er að læra. Hann er að vinna upp eftir veikindin. Allir urðu veikir nema Benedikt. Þetta var ansi svæsin pest og erum við mjög fegin að henni er lokið:-)

Ætli ég drífi mig ekki út með drengina núna. Bestu kveðjur..

Hmmmm

2008-02-29T18:37:00.002-06:00

I dag er hlauparsdagur og alveg naudsynlegt ad blogga adeins. Gaerdagurinn gekk vel, vid forum i foreldravidtol og ad sjalfsogdu allt til fyrirmyndar hja drengjunum okkar. Hallgrimur var to eitthvad veikur og endadi hja laekni sem skrifadi upp a pensilin fyrir hann. Tad er ohaett ad segja ad tad virkadi fljott og drengurinn allur annar:-) Hann var to heima med mer og Kara i dag, Kara til mikillar gledi. Nuna erum vid ad hugsa um ad skella okkur a Appelbees i sma kvoldmat, svona adeins ad halda upp a godan namsarangur.
Tid afsakid skrifin en eg er ekki med islenskt lyklabord i augnablikinu. Bid ad heilsa

skýjabólstrar og sól

2008-02-26T11:00:00.002-06:00

Það er yndislegt veður, sól og fallegt, ég húki inni með veika pilta, ekkert voðalega veika bara einhver smá hiti. Við erum að útbúa okkur hádegismat, mac og cheese, voða gott.
Ég var að setja inn myndir frá afmælinu hans Kára.

Kári er þriggja ára í dag

2008-02-24T09:49:00.004-06:00

Það verður afmæli hjá okkur klukkan þrjú.

Annars er allt gott af okkur að frétta, það situr fálki úti í garði og er að hamfletta fugl, Hari og Hallgrímur eru í verslunarferð og restin að undirbúa veisluna. Kári ætlar að hafa tvennskonar kökur í afmælinu, lestarköku og snjókallaköku. Iowakveðjur

Snjór og aftur snjór

2008-02-19T09:49:00.003-06:00

Enn heldur áfram að snjóa, færðin hefur ekki batnað mikið og engin skóli í dag!

Drengirnir eru búnir að fá heimsókn, Hekla og Fannar eru komin og það er nú ekki leiðinlegt á bænum þá. Annars erum við búin að vera í frí saman ég og drengirnir mínir. Fjagra daga helgi, svaka stuð. Benedikt og Halldór skelltu sér á skauta í gær, það var ansi skrautlegt og mæli ég með fleiri ferðum svona til að ná betra jafnvægi. Móðirinn ákvað að prófa ekki, kannski seinna.

Við Hari fórum á þorrablót um helgina. Það var haldið hjá Kötu og Hjalta og var alveg einstaklega vel heppnað blót. Það var vel mætt, við fengum gesti frá nærliggjandi sveitum og fylkjum. Maturinn, sem var fluttur inn frá Íslandi, var bara ansi góður og ekki má gleyma ísköldu Brennivíninu sem rann ljúft niður.....

Bestu kveðjur

Bolludagur

2008-02-05T10:38:00.000-06:00

Hér erum við strákarnir að byggja snjóhús. Það hefur snjóað ansi mikið undanfarið og það heldur áfram að snjóa. Í gær var enginn skóli (vegna veðurs!) hjá H, B og H þannig að slegið var í bolluveislu. Við bökuðum 60 bollur og fengum góða íslendinga í heimsókn.
Í kvöld verður svo kosningavaka á heimilinu. Við ætlum að gera baunasúpu að hætti Iowabúans, því miður ekkert saltkjöt:-(
Annars höfum við það alveg ágætt, smá kef að hrella suma heimilismenn en ekkert alvarlegt. Benedikt og Halldór fóru á mini-Dance-Marathon um daginn í skólanum sínum. Hallgrímur og Kári fóru líka, það var dansað í tvo tíma, þetta fannst þeim bræðrum mjög skemmtilegt. Nú fer Valentínusardagurinn að nálgast og er Hallgrímur búinn að bjóða foreldrum sínum í teboð á leikskólann í tilefni þess. Það er gaman að því hvað Kaninn er alltaf duglegur að stytta sér stundir með allskyns "hátíðum".
Ég set inn nokkrar myndir og við biðjum að heilsa.

Gleðilegt ár

2008-01-20T09:23:00.000-06:00

Gleðilegt ár kæru vinir og vandamenn.
Takk fyrir okkur á Íslandi, það var mjög gaman að koma í heimsókn og hitta ykkur öll. Ég átti þó aldrei von á því að það yrði svona erfitt að snúa sólarhringnum við. Það bara hreinlega gekk ekki, þannig að þegar við vorum komin aftur heim til Iowa voru fjölskyldumeðlimir ansi fljótir að jafna sig á tímamismun, svona næstum eins og við hefðum aldrei farið!
En nóg um það, nú eru drengirnir búnir að vera í skólanum og allt gott að frétta þaðan, Hari byrjar á þriðjudaginn, þar sem á morgun er Martin Luther King dagur og því enginn skóli hér í USA. Hér er ansi kalt þessa dagana fór í -25 gráður í gær. Bensi og Halldór voru að leika sér á sleða með vini sínum á föstudaginn, það var svo kalt að varirnar á Bensa festust við rennilásinn á úlpunni hans, þeir voru gjörsamlega frosnir. En við njótum fallega veðursins og dáumst að dýralífinu hér, dádýr í garðinum og skallaernir í trjánum.
Bestu kveðjur og ég set inn myndir hið snarasta

Minneapolis

2007-12-26T22:25:00.000-06:00

Þá erum við kominn til Minneapolis, búin að kíkja aðeins í MOA og erum á hótelinu að hafa það notalegt;-). Morgundagurinn verður ósköp rólegur þar til við tékkum okkur inn í flugið.
Jólinn voru ansi fín, aðfangadagur gekk vel og strákarnir mínir alveg ofsalega rólegir og góðir. Á jóladag fórum við til Bjarkar og Óttars í hangikjöt og uppstúf, ásamt öllum hinum Íslendingunum.
Sjáumst fljótlega og bestu kveðjur

Jólin nálgast....

2007-12-18T14:09:00.000-06:00

Desember er búinn að vera ósköp skemmtilegur fyrir utan smá veikindi í byrjun mánaðarins. Við fórum í leikhúsið ég og stóru strákarnir að sjá My Fair Lady, mjög flott og skemmtileg sýning. Húsmóðirin varð árinu eldri, það styttist í tuginn á þeim bænum! Hér er búið að baka piparkökur og fara á jólaball með Stúfi, sem var rosalega gaman. Núna er Hari í prófum, er búinn á föstudag og Bensi, Halldór og Hallgrímur eiga einn dag eftir í skólunum sínum.
Úti er snjór og ósköp fallegt veður, hitastigið komið yfir 0 gráður en Kári og Hallgrímur vilja bara horfa á sjónvarpið í augnablikinu. Við erum að bíða eftir að B og H komi heim svo við getum farið að skreyta jólatréið og bakað svolítið meira.
Annars er hugurinn eiginlega kominn til Íslands, allir orðnir voðalega spenntir að koma í heimsókn og hitta ættingja og vini.
Ég set inn nokkrar myndir og allir hér biðja að heilsa og þakka fyrir góðar kveðjur:-)

Skólinn byrjar aftur

2007-11-30T11:43:00.001-06:00

Þá erum við búin að vera í fríi öll saman. Þakkargjörðarboðið tókst afskaplega vel og voru kalkúnarnir mjög góðir ásamt öllu meðlætinu.

Hér eru ansir margir búnir að skreyta hjá sér og það er ekki laust við það að fjölskyldan á Bambagötu sé komin í jólaskap. Við ætlum þó ekki að skreyta hjá okkur fyrr en um helgina, það er setja upp jólaljós á húsið og kannski einn uppblásinn bangsa í beðið! Kári er alveg að tryllast í jólaljósadýrðinni, honum finnst þetta svo gaman og vill helst að við kaupum allt alveg eins og allir hinir.

það er farið að kólna hjá okkur og eigum við von á snjó um helgina. Strákarnir náðu að fara aðeins á þotu í frívikunni en snjórinn var ekki mikill svo hann er allur farinn núna.

Þá er komið að því að fara að sækja Hallgrím á leikskólann, við Kári erum búin að eiga rólegan og góðan morgun. Fórum í morgunkaffi hjá Björk og Þorra vinum okkar og svo aðeins að versla. Ég set inn myndir á eftir, bestu kveðjur.

Notalegt haust

2007-11-15T11:49:00.000-06:00

það er ósköp rólegt hjá okkur þessa dagana. Kári er búinn að vera lasinn, fékk gubbupest og er jafna sig á henni. Hinn karlpeningurinn er bara hress.

Það haustar hjá okkur núna, næturfrost og rok en að öðru leyti bara ósköp gott. Við fórum í mat til Kötu og Hjalta á laugardaginn sem var mjög gaman. Ætluðum líka til Önnu og Geirs á sunnudeginum en þar kom upp gubba eins og reyndar á fleiri heimilum þannig að ekkert varð úr því.

Á laugardaginn kemur er svo búið að bjóða mér í dömuselskap, sem ég er ansi spennt fyrir. Það er kominn tími á okkur að skilja mömmuklúbbinn eftir heima og aðeins að skvetta úr glösum.

Bestu kveðjur frá sléttunum og áfram Obama

Hrekkjavaka og skemmtileg heimsókn

2007-11-07T18:08:00.000-06:00

þá er hrekkjavaka búin. það var voðalega gaman hjá okkur, við fórum til Kötu og Hjalta í trick or treat ásamt öllum hinum Íslendingunum. Drengirnir græddu heil ósköp af sælgæti:-)
Garðar kom til okkar um helgina. Hann er staddur í Chicago vegna vinnunnar og ákvað að eyða fríhelginni sinni með okkur. það var mjög gaman að fá hann, við Hari notuðum tækifærið fengum okkur barnapíu og fórum út að borða.
Annars er allt fínt héðan, fórum í góðan göngutúr í morgun, ég og Kári ásamt kraftgöngukvennsunum. Við gengum um hverfið mitt og fengum okkur svo hádegismat allar saman. Núna er Hari í prófum næstu tvær vikur síðan er Þakkargjörð hér í USA. Þá er frí hjá skóladrengjunum og fjölskyldan voða spennt fyrir því.
En núna eru drengirnir orðnir gagaga af afskiptaleysi móður sinnar þannig að ætli ég segi ekki bara hafi þið það sem allra best og setti inn nýjar myndir.
Kalli bró átti afmæli í gær, til hamingju

Mánudagur

2007-10-29T11:43:00.000-06:00

Við áttum góða helgi fjölskyldan. Fórum til Madison, Wisconsin.
Erindi ferðarinnar var að sjálfsögðu fótbolti, en í leiðinni kíktum við á gamlar heimaslóðir húsbóndans, sem var ekki leiðinlegt. Þetta er falleg borg og það var gaman fyrir strákana að sjá hvar pabbi þeirra hafði farið í skóla, leikið sér og átt heima þegar hann var lítill.
Benedikt og Halldór komu ekki tómhentir heim frá þessu móti. Liðið þeirra lenti í öðru sæti og fengu þeir glæsilegan verðlaunagrip að launum.

Núna eru helstu verk hér að raka saman lauf úr garðinum og skreyta fyrir Hrekkjavöku, sem er á miðvikudaginn kemur. Drengirnir eru búnir að finna sér búninga, það eru bara við Hari sem eigum eitthvað erfiðara með það.
Allir biðja að heilsa héðan og nýjar myndir eru á leiðinni..............

Langafi kemur í heimsókn

2007-10-03T14:29:00.001-06:00

Ég fór og hitti kraftgöngukonurnar í morgun, við fórum rúnt í miðbæ Iowa City, gengum meðfram ánni og enduðum síðan á léttum hádegisverði. Við mættum sprengjuleitarbíl og nokkrum jakkafata, sólgleraugnatöffurum á svörtum jeppum. Það hefur nefnilega verið svolítið um sprengjuhótanir í Háskólanum og þeir höfðu greinilega fengið eina slíka í morgun.
Við erum núna að njóta góða veðursins og taka pínulítið til áður en næstu gestir koma. Það eru góðir dagar framundan hjá okkur, með langafa og börnunum hans, Elsu og Ásgeiri. Við Hari og strákarnir höfum verið afskaplega heppin hvað margir hafa lagt leið sína til okkar, því við erum nú ekki alveg í alfaraleið.

Rólegur dagur

2007-09-27T13:29:00.001-06:00

Við mamma ákváðum að taka því rólega í dag. Hún er í sólbaði og ég lét verða af því að setja inn nokkrar myndir af fjölskyldunni. B og H voru að koma heim úr skólanum og vilja endilega fara á bókasafnið, svo þangað er ferðinni heitið núna. Þeir slá ekki slöku við í lestri, þó nóg sé að gera í skólanum. Þeir eru svo gjörsamlega heillaðir af manga..... Eitthvað sem mamman átti ekki von á.
Takk fyrir kveðjurnar og bestu kveðjur til baka.

Hallgrímur 4 ára

2007-09-24T19:20:00.000-06:00

Þá er komið að þriðja og síðasta afmælinu í þessum mánuði. Á morgun, 25 sept, verður Hallgrímur 4 ára. Hann ætlar að hafa veislu og er búinn að bjóða íslensku vinunum sínum og Hyrum leikskóla vini sínum. Hallgrímur er einn af þeim sem veit alltaf hvað hann vill og er því búinn að skipuleggja heljarinnar veislu með leikjum, þrautum og tilheyrandi. Nú reynir bara á mömmuna og pabbann að koma þessu öllu til skila á sem bestan máta :-)

Annars er bara allt gott að frétta, veðrið gæti ekki verið betra, það er aðeins byrjað að hausta og einstaka nágranni er farinn að setja út Halloween skraut...........

Húsbóndinn árinu eldri

2007-09-22T07:27:00.000-06:00

Hari átti afmæli í gær. Hann var reyndar í prófi og að sinna verkefnum mestan part dagsins en við fórum þó öll út að borða og höfðum svo bíókvöld. Á myndinni með honum er Jón Sigurðsson forseti sem við fundum í Winnipeg á ferðalaginu okkar.

Ferðalagið til Des Moines gekk vel, fótboltinn gekk þó ekki eins vel, en það kemur!

Biðjum að heilsa....

Afmæli

2007-09-14T09:13:00.001-06:00

Mamma á afmæli í dag, 71 árs. Þetta er fyrsta afmælið af þremur í þessum mánuði. Þannig að kökur og partý er eiginlega yfirskrift þessa mánaðar.
Annars erum við á leiðinni til Des Moins ég og mamma með drengina, það verður spilaður smá fótbolti, farið út að borða og eflaust eitthvað kíkt í búðir. Við verðum þarna fram á sunnudag:)
Hér er eitthvað byrjað að hausta og finnum við það helst á hitastiginu sem fer hratt niður á við, svo núna er bara að finna til buxur og peysur fyrir liðið.
B og H hafa aðlagast ansi vel í skólanum og Hallgrímur er farinn að syngja á spænsku;)
Smá meiri fréttir man ekki alveg hvort ég er búin að segja frá því en í ágúst fæddist ein lítil skvísa, Heiðrún Hjaltadóttir, rokkari af bestu gerð og svo er Arna Brá Birgisdóttir viku gömul í dag, þannig að það er óhætt að segja að íslendingunum fjölgi hér í Iowa!
Allir senda bestu kveðjur heim til ykkar.........

Fríið búið

2007-08-22T21:57:00.000-06:00

þá er loksins komið að því. Nú er ég búin að vera hér í eitt ár og átta daga. Tíminn líður ansi hratt verð ég að segja. Nú hefst rútína númer tvö, skólarnir að byrja, þrír elstu drengirnir eru byrjaðir, sá allra elsti byrjar ekki fyrr en í næstu viku og sá yngsti spyr: "hvar er minn skóli?" En H,B og H eru að standa sig ansi vel. Nýji skólinn hjá H og B er svolítið erfiður og heilmikil heimavinna þó aðeins þrír dagar séu búnir og Hallgrímur fer í spænsku og tónlist á morgun, sem er voðalega spennandi. Svo það er óhætt að segja að það er nóg að gera hjá þeim. Svo er fótboltinn byrjaður og um helgina er fyrsta mótið hjá þeim bræðrum, sem verður örugglega voðalega skemmtilegt, ég tala ekki um þar sem ég fæ að standa í sjoppunni í tvo tíma og selja walking tacos, eða eitthvað álíka skemmtilegt.
Segjum þetta gott í bili, læt heyra mjög fljótlega í mér aftur og set inn myndir úr ferðalaginu fyrr en seinna.
Í dag á Þorgeir Kristinn Karlsson Blöndal afmæli og við óskum honum innilega til hamingju, pilturinn er 12 ára.

Dagur III

2007-07-31T20:51:00.000-06:00

Við vorum að koma inn á hótel eftir alveg frábæran dag. Sáum vísunda, fjallageitur, sléttuhunda og dádýr, keyrðum í gegnum Custer state park, kíktum á Crazy Horse og að sjálfsögðu á forsetana fjóra sem eru alveg ótrúlega flottir. Flestir voru þó orðnir ansi þreyttir eftir daginn og Kári sofnaði á leiðinni heim. Annars er alveg ótrúlegt hvað þeir bræður eru góðir í ferðinni, því börnum finnst nú ekki alltaf gaman að sitja lengi í bíl:)

Dagur I og II

2007-07-30T21:35:00.000-06:00

Þá erum við komin til Rapid City, South Dakota. Við lögðum af stað í gærmorgun og keyrðum þá til Sioux Falls og gistum þar, ferðalagið þangað tók aðeins 8 klukkutíma með ágætum stoppum! Í Sioux Falls heimsóttum við Önnu Margréti, Örvar og krakkana þeirra. Það var mjög gaman að sjá nýja húsið sem er hið glæsilegasta og ég tala ekki um að hitta þau öll:)
Í morgun lögðum við svo af stað hingað til Rapid City, sem tók okkur 6 tíma í keyrslu með stoppum, en þetta var mjög skemmtileg keyrsla og óvenjulegt landslag allt frá sléttum í fjöll. Það er líka óhætt að segja að vestrið lifir enn, vísundar, kúrekar og indíánar hér allt í kring.
Á morgun verður svo farið í ferð hér um svæðið, en við ætlum að gista hér í þrjár nætur enda meir en nóg að skoða. http://www.travelsd.com/

2007-07-25T13:53:00.000-06:00

Það er óhætt að segja að hér sé fjör alla daga eftir að stóru strákarnir lentu. Kári og Hallgrímur eru svo ánægðir með að hafa endurheimt bræður sína að þeim finnst ómögulegt að gera nokkuð án þeirra og hvað þá að fara að sofa á kvöldin. Bensi og Halldór eru svo flottir og það er alveg ótrúlega gaman hjá okkur.

Núna erum við á fullu að skipuleggja fríið okkar, sem við ætlum að leggja af stað í á sunnudaginn kemur. Black Hills og Winnipeg eru áfangastaðirnir. Voðalega spennandi!

Í gær fórum við Hallgrímur í vettvangsferð með leikskólanum hans. Það var mjög gaman, við fórum að skoða húsdýr. Þessi húsdýr voru frábrugðin venjulegum þar sem þau voru öll að keppa um hvert þeirra væri best, þ.e. besta kjötið, besta mjólkin, bestu eggin eða besta öndin:) Þarna var beljuþvottastöð, þar sem beljunum var raðað upp og þær þvegnar,(minnti á bílaþvottaplan á Íslandi) síðan voru þær ryksugaðar svona til að setja punktin yfir iið. Kindurnar voru í hálfgerðum sundbolum, ekki veit ég afhverju, en þetta var ansi sérstakt og skemmtilegt.

Strákarnir koma heim.......

2007-07-16T17:04:00.000-06:00

Þeir lenda eftir þrjá klukkutíma hjá okkur ásamt ömmu sinni. ohhhh það verður svo gaman að fá þá heim. Þeir eiga svo afmæli á morgun, 11 ára. Ég og litlu kallarnir fórum áðan í Target að kaupa afmælisgjafir, lentum reyndar í hvirfilbyl á meðan og vorum látin bíða hann af okkur innst í búðinni í tæpan klukkutíma.

En nú ætla ég að halda áfram að undirbúa komu þeirra, bið að heilsa öllum í góða veðrinu á ísl.....

2007-07-10T12:52:00.000-06:00

Jæja nú er orðið ansi langt síðan síðast. Enda fjölskyldan búin að vera upptekin síðastliðnar þrjár vikur. Við fengum nefnilega svo skemmtilega heimsókn, hann Úlfur kom með mömmu sinni henni Ingibjörgu. Við vorum ansi dugleg við að finna okkur eitthvað að gera og var þetta hinn skemmtilegasti tími. Drengirnir þrír náðu voðalega vel saman og fannst ekkert skemmtilegra en að sulla í garðinum, fara í bíltúr í dýragarðinn, fara á ströndina eða bara í göngutúr í hverfinu. Við Ingibjörg stungum líka af til Chicago eina nótt sem var ekki leiðinlegt. Hari stóð sig einstaklega vel með drengina þrjá, sem breyttust í litlar ofurhetjur á meðan;)

Við gerðum okkur líka glaðan dag á 4 júlí. Fylgdumst með skrúðgöngunni, fengum svo Íslendingana í garðinn og grilluðum, um kvöldið var svo flugeldasýning, sem var mjög gaman þar sem ekki má skjóta flugeldum á öðrum dögum en þessum!

Núna er allt við það sama, Hallgrímur er ánægður á leikskólanum sínum, Kári er með mömmu sinni og Hari er á fullu í sínu námi. Eftir viku koma svo Halldór og Benedikt aftur heim, með þeim í för verður amma Gunna. Hún ætlar að koma og vera hjá okkur fram í október. Það verður nú ekki leiðinlegt.

Við biðjum að heilsa og vonum að allir séu að njóta góða veðursins.

Komnar nýjar myndir

17 júní 2007

2007-06-17T19:08:00.000-06:00

Gleðilegan þjóðhátíðardag

Hér héldum við upp á daginn í Kent park sem er aðeins fyrir utan bæinn. Þangað mættu þeir Íslendingar sem eru í bænum. Við grilluðum og lékum okkur aðeins, þetta var mjög fínt.

Núna er Hallgrímur byrjaður í leikskólanum og stóð hann sig ofsalega vel, ég var mjög stolt af honum. Honum fannst svo gaman að það hefur ekki verið neitt mál að fara aftur. Hann og Kári fengu sér skólatöskur, Diego og Thomas töskur.
Ásgeir á afmæli í dag, 15 ára pilturinn, við óskum honum til hamingju.
Setti inn nýjar myndir

2007-06-12T14:49:00.000-06:00

Hér er allt við það sama ósköp notalegt og fínt. Hari er í skólanum á morgnana svona til að byrja með og á morgun byrjar Hallgrímur í leikskólanum. Við ætlum að fara á eftir og kaupa skólatösku, til að setja bækur og aukaföt í. Hann er orðin ansi spenntur að byrja.

Bensi og Halldór eru að hafa það ansi gott á Íslandi, þeir hringdu áðan, voru voða spenntir þar sem þeir höfðu farið á sjó með pabba sínum og afa og veitt myndarlegan þorsk!

Í síðustu viku lentum við í ansi óvanalegri aðstöðu þegar viðvörunar bjöllurnar glumdu hér í bæ og allir þurftu að fara niður í gluggalausu geymsluna sína á meðan hvirfilbylurinn fór framhjá. Það urðu engin slys í þetta skiptið, allavega ekki hér í Iowa. Þetta var frekar óvenjulegt og svolítið skrítið. Ég, Hallgrímur og Kári vorum í hádegismat hjá Önnu Margréti Jóns ásamt Björk og hennar þremur börnum þegar þetta gerðist þannig að niður í geymslu fórum við þrjár ásamt sjö börnum og þurftum að sitja þar í næstum klukkutíma:) Það gekk ótrúlega vel...

Núna er allt rólegt, 34 stiga hiti og allir inni í augnabikinu að hvíla sig. Ég fer að setja inn nýjar myndir bráðlega en þangað til hafi þið það sem allra best og til hamingju með daginn Brynja mín

2007-06-05T07:33:00.001-06:00

Hér heldur sumarið áfram í allri sinni dýrð. Hari var að fara í sinn fyrsta tíma og þeir litlu aðeins að kíkja á barnatímann. Bensi og Halldór eru að klára að pakka, alveg að verða tilbúnir í ferðalagið til Íslands. Það verður tómlegt hjá okkur þegar þeir fara en þeir eru mjög spenntir og hlakka mikið til að hitta ættingja, vini og fá sér bæjarins bestu!
Ég vona að allir hafi lesið barnablað moggans um síðustu helgi og séð tvíburana frá Iowa.
Skrifa fljótlega, hafi þið það sem best á Íslandi

Gestir í Bambagötu og afreksmaður á forsíðu

2007-05-22T21:23:00.000-06:00

Kirkwood Elementary students Chan Hee, 11, left, and Benedikt Karlsson, 10, celebrate after taking first place in the fifth-grade boys' three-legged race during the Iowa City Elementary Track and Field Days at West High School on Monday, May 21, 2007. Press-Citizen / Dan Williamson

Þessi mynd og texti voru á forsíðu íþróttablaðs dagblaðsins hér í Iowa City í dag. Allir fimmtu og sjöttu bekkingar voru að keppa í ýmsum þrautum og stóðu bræðurnir sig einstaklega vel í öllum greinum sem þeir kepptu í og komu svo ánægðir heim.

Margrét Halldóra, Ásgeir, Hallgrímur og Ragnheiður eru komin til okkar. Þau verða í viku og ætlum við að vera dugleg að skoða hér í kring, versla svolítið og svo bara hafa það gott saman.
og svo smá meiri gleðifréttir því Kári og Eyrún eignuðust son 16 maí, hann fékk nafnið Þór og er svo flottur. Við erum í sambandi við þau á hverjum degi og kíkjum á herrann á skæpinu. Það er gaman að hafa þennan möguleika að geta séð og fylgst með nýfæddum frænda svona í gegnum tölvun
Tómatatréin eru komin niður, það er rammgirt í kringum þau svo kanínurnar borði þau ekki. Þær eru víst vitlausar í tómatatré!
Hér eru allir svo ánægðir með heimsókn og nýjan frænda, gott veður og blóm í haga.
Biðjum að heilsa.

Pappírsbrúðkaup

2007-05-13T20:57:00.000-06:00

Við eigum brúðkaupsafmæli í dag. Eitt ár liðið frá þessum frábæra degi og af því tilefni hef ég sett inn nokkrar myndir frá athöfninni og veislunni svona fyrir þá sem ekki hafa séð.
Fjölskyldan fór í ferðalag um helgina. Við fórum til Des Moines (höfuðborg Iowa), þar sem Benedikt og Halldór tóku þátt í fótboltamóti. Þetta var ansi skemmtilegt, þó að liðinu þeirra hafi ekki gengið sem skildi:(
Annars eiga Hallgrímur tengdapabbi og Anna Kristín mágkona afmæli í dag. Við óskum þeim innilega til hamingju með daginn.
Nú svo voru kosningaúrslitin ekkert svo slæm, vinstri grænir og sjálfstæðisflokkurinn unnu, einmitt eins og maður hafði vonað:) Það verður gaman að sjá hvað kemur út úr því.

2007-05-03T09:13:00.000-06:00

Æji hvað það er gaman að fá kveðju frá ykkur, takk takk fyrir það.

Ég var að setja inn nokkrar myndir. Við Anna Margrét Svavars. skelltum okkur yfir eina nótt til Chicago um daginn. Það var mjög skemmtilegt og endurnærandi.

Svo erum við strákarnir alltaf í boltanum þessa dagana eins og áður sagði og um daginn kepptu B og H við Arsenal, (en þeir halda með Arsenal í enska boltanum) og að sjálfsögðu unnu þeir, það er B og H, en þeirra lið heitir Matrix.

Hér eru allir orðnir spenntir að fá fjölskylduna frá Látraströndinni í heimsókn. Þau ætla að koma 21 maí til okkar og vera í nokkra daga.

Finnst ykkur ekki málverkið flott, það er eftir bandarísku myndlistarkonuna Georgia O'Keeffe.

Sá þetta í Chicago og heillaðist svona líka. Heyrumst..

Það er orðið langt síðan síðast........

2007-04-30T08:35:00.000-06:00

En við höfum það alveg ágætt, horfðum á B og H keppa í fótbolta á laugardaginn, þeir unnu 3 - 1. Svo var komið heim og aðeins slappað af áður en farið var í afmæli til hennar Ingu Bryndísar, hún var að halda upp á IV ára afmælið sitt. Það var mjög gaman, vel mætt af Íslendingum, eins og alltaf. Síðan komum við heim og litlu herrarnir fóru í bað með nýju vatnsbyssurnar sínar, sem var ekki leiðinlegt:)
Það er skemmtilegt frá því að segja að á sunnudeginum gerðum við nákvæmlega það sama, eða byrjuðum daginn á fótbolta, fórum svo í afmæli til Elísubetar í sveitina, sem var mjög skemmtilegt.

Það er komið ansi gott veður, tréin eru í blóma, meira að segja nokkur tré í garðinum okkar sem er algjör draumur. Þetta er mynd af perutréinu okkar ég rétt náði að taka mynd af síðasta blóminu.

Bið að heilsa öllum

Föstudagskvöld í Coralville

2007-04-20T17:21:00.000-06:00

Betra er seint en aldrei. Þessi færsla átti að fara inn um daginn en það misfórst eitthvað.

Klukkan er að verða hálf sjö og ég sit hér úti í garði og nýt góða veðursins. Hari ætlar að grilla handa okkur, Bensi og Halldór eru að æfa sig í hafnarbolta og Hallgrímur og Kári eru að sulla í eldhúsinu sínu. Allir að hafa það bara nokkuð gott eftir erilsama viku.
Aldrei þessu vant hefur verið heilmikil dagskrá hjá okkur svona fyrir utan venjulegan vinnutíma.
Ég og hinar íslensku kvennsurnar ásamt þremur mæðrum og einni ömmu skelltum okkur í leikhúsið á þriðjudaginn. Það var verið að sýna Hársprey, (Hairspray) sýning sem er búin að vera lengi á Broadway við góðar undirtektir. Það var mjög skemmtilegt.
Hari og Örvar skelltu sér aftur á móti á fyrirlestur hjá forsetanum fyrrverandi Jimmy Carter á miðvikudaginn. Sem ég efast ekki um að hafi verið ágætis skemmtun líka.
Í gær stormaði svo fjölskyldan til Bjarkar og Óttars, en heimili þeirra varð kjörstaður og mætti konsúlinn frá Minneapolis til að stýra þessu og sjá til þess að allt færi fram samkvæmt lögum. Við stóðum okkur bara nokkuð vel og náðum inn 17 atkvæðum, sem verða sett í póst á næstu dögum. Það er greinilega nóg af íslendingunum hér og auðvitað kusu allir rétt.

2007-04-12T09:12:00.000-06:00

Hæ hér er Kári með litla bróður eða litla baby eins og hann kallar dúkkuna. Hann var að fá hana í afmælisgjöf, voðalega ánægður eins og ég áður sagði. Þeir bræður fóru á bókasafnið í gær og komu heim með fangið fullt. Bensi og Halldór lesa bara manga bækur núna, finnst ekkert skemmtilegra og Hallgrímur og Kári fundu sér tölvuleik og dvd mynd, Hallgrímur er að verða svo flinkur með músina og Kára finnst ekkert leiðinlegt að horfa á, ennþá!

Annars er allt í snjó núna:) veit ekki alveg hvað er að gerast en það er bara ósköp fallegt veður úti. Vona að allir hafi það gott, heyrumst.

Páskar

2007-04-10T08:53:00.000-06:00

Þá eru Páskarnir búnir, ef kalla skyldi páska. Hér var allt eins og vanalega, skóli, vinna o.s.frv. En við hér á Brúnu Bambagötu fengum öll páskaegg og þökkum við ömmu Ragnheiði sérstaklega fyrir það. Kári fékk líka síðbúna afmælisgjöf og var hann agalega glaður. Það var lítill bróðir:)
Það er óhætt að segja að hér séu veðursviptingar, ég er ekki fyrr búin að tala um hækkandi hitastig þegar allt fellur og við erum aftur komin í húfur og vettlinga. Ég held að þessu veðurblaðri mínu sé endanlega lokið, það er ekkert að marka þetta.......
Annars er hann frændi minn, Benedikt Blöndal, að fara að fermast núna á laugardaginn, æji ég væri nú alveg til í að mæta þar og hitta aðeins fjölskylduna. En það verður að bíða betri tíma.
Bensi og Halldór eru að fara að keppa um næstu helgi, vona að það verði orðið hlýrra! Við þurfum að mæta ansi snemma á sunnudeginum eða um kl 6:30. Þeir eiga að keppa kl 7:00.
það er svo gaman að fylgjast með þeim, þeir eru alltaf að verða betri og betri.
þá kalla Kári og Hallgrímur, þeir eru svangir, best að fara og sinna þeim. Ég set inn myndir á eftir.

Þrumuveður

2007-04-03T09:23:00.000-06:00

Það er ekki svefnsamt um nætur núna vegna ótrúlegra þruma og eldinga, hagls og rigningar.
Nú er að hefjast tímabil hvirfilbylja og þrumustorma (thunder storms). Í apríl í fyrra fór hvirfilbilur um Iowa City og tók með sér nokkur hús, bíla og annað lauslegt. Það má lesa um það hér: http://www.icpl.org/tornado/ Við erum að sjálfsögðu búin að skipuleggja hvað gera skal ef bjallan glimur;). Þetta er pínulítið spennandi og framandi, ég vakna hér á morgnana ósofin og spyr drengina hvort þeir hafi ekki heyrt í þrumunum, rigningunni eða kannski haglinu og þeir horfa á mig með skrítnum svip og segja nei.... Ég skil ekki hvernig hægt er að sofa í þessum hávaða.
En nóg um það vona að allir hafi það gott í hitabylgjunni á Íslandi, og gleðilega páska allir saman.

2007-03-31T12:45:00.000-06:00

Hér eru bræðurnir að gæða sér á ís í göngu- hjólatúrnum okkar. Núna eftir að það fór að hlýna reynum við að fara svolítið út að viðra okkur. Það er ansi stutt síðan ekki var hægt að opna glugga fyrir kulda en svona er þetta. Hér er allt að verða ansi fallega grænt, tréin aðeins að byrja að blómstra og H og B byrjaðir að æfa fótbolta úti! Mikill munur. Hari er í ritgerða og próf syrpu núna, það gengur bara vel hjá honum.

Íslendingahópurinn er enn að stækka og fæddist lítil dama hér fyrir viku síðan, hún fékk nafnið Ása Dagrún og er dóttir Önnu Margrétar og Geirs, læknahjóna.

já og það var ekki leiðinleg símhringing sem ég fékk á föstudagskvöldið úr Þjórsárdalnum. Ég þakka vinkonum mínum fyrir það, alltaf gaman að heyra í ykkur elskurnar.

Fjölskyldan í fríi

2007-03-17T20:39:00.000-06:00

Það er laugardagskvöld og yngstu meðlimirnir eru sofnaðir. Það er verið að sækja hina tvo þeir fengu að fara í pizzu og video til hans Fannars vinar síns. Fannar var að eignast lítinn bróður fyrir viku síðan, sem fékk nafnið Þorri Heiðar.
Annars er búið að vera voðalega gaman hjá okkur í vikunni, snjórinn horfinn, hitinn fór í 25 gráður, jólaserían tekin niður, farið í bíltúr í höfuðborgina, Des Moins, og kíkt í dýragarðinn, farið út að hjóla og grillað með vinum.
Ég held að vorið sé eiginlega bara alveg að koma. Það er ekki leiðinlegt, svona sérstakleg af því að það er ennþá Mars. Í mínum huga er þetta alveg yndislegt og einn af kostunum við að búa erlendis.
Annar kostur er allt þetta dásamlega dýralíf. Hér sér maður villta kalkúna í vegakantinum, hinn glæsilegi ameríski Skallaörn svífur um, Bambi kemur alltaf í garðinn á nóttunni og íkornar og kanínur á daginn.
En ég er búin að setja inn nýjar myndir og vona að allir hafi það gott á Íslandi!

2007-03-07T13:18:00.000-06:00

Hér er Hallgrímur að hjálpa til við snjómoksturinn. Við erum að gera okkur vonir um að snjórinn verði farinn í næstu viku og vorið sé á næsta leiti. Allavega er hitastigið að fara hækkandi.......

Í næstu viku er svokallað vorfrí hjá skóladrengjunum þremur. Við erum að hugsa um að kíkja á einhverja af stórborgunum hér í kringum okkur og skoða sveitina svolítið. Það er allavega alveg tilvalið að fara eitthvert.

Foreldraviðtölin gengu mjög vel, B og H eru að standa sig alveg rosalega vel. Ég er alveg ótrúlega stolt af þeim. Þeir eru líka búnir að vera að keppa í fótbolta síðastliðnar tvær helgar og gekk bara mjög vel, fyrri helgina lenti liðið þeirra í öðru sæti og þá seinni í fyrsta. Voðalega gaman hjá þeim, að sjálfsögðu.

2007-03-01T10:17:00.000-06:00

Ég fór með strákana á Childrens Museum um daginn, það var mjög gaman. Þar er ýmislegt við að vera og fundu þeir sér allir eitthvað að gera. Ég setti inn myndir frá því, ásamt öðrum eins og frá afmælinu hans Kára.
Hér er annars allt í fínu standi. Ég fór og hitti Iowa kvennsur í gær, nú er sú fjórða búin að bætast í óléttu hópinn. Það eiga tvær að eiga núna í mars og tvær í ágúst. Svo það verður gaman hjá mér næsta vetur í mömmuklúbbnum..........
B og H eru í fríi í dag, það eru foreldraviðtöl. Ég fer kl 3, það verður forvitnilegt að heyra í kennaranum þeirra hvernig þeim gengur í skólanum.
það rættist aðeins úr veðrinu, kom allavega ekki frostregn en það er svolítið íslenskt veður núna rigning og rok, nema það eru líka þrumur og eldingar. Strákarnir vilja fara í mollið og ætli ég láti það ekki bara eftir þeim. Heyrumst seinna

2007-02-28T14:06:00.000-06:00

Hérna er litla afmælisbarnið okkar. Hann varð tveggja á laugardaginn var. Við héldum að sjálfsögðu upp á það, þó að veðurspáin væri slæm. Það var ágætlega mætt, en fólk dreif sig þó heim þegar rafmagnið fór af hjá okkur og skyggnið fór að versna. Það kom svokallað frostregn (freezing rain)með þeim afleiðingum að tré og trjágreinar brotnuðu undan þunga frostsins og strax á eftir byrjaði svo að snjóa. Ég tók nokkrar myndir, bæði af trjánum okkar sem brotnuðu og af trjám í götunni. Við vorum án rafmangs í 16 klukkutíma en sumir eru ennþá án rafmagns.

Það er reyndar von á öðrum svona stormi seinna í dag;) vona að rafmagnið haldist, því án þess verður ansi kalt í húsinu......

2007-02-12T09:28:00.000-06:00

Þá er veturinn kominn fyrir alvöru. Fengum símhringingu kl 6 í morgun, enginn skóli hjá H og B vegna snjókomu. Okkur íslendingunum finnst þetta nú ekki mikið mál, enda dreif Hari sig í skólann. Spáin er víst áframhaldandi snjókoma og frost........
En hvað um það þá höldum við áfram hér að hafa það voðalega gott. Við Hari fórum á þorrablót hjá Hjalta og Kötu á laugardaginn, það var rosalega gaman, mikið sungið, drukknir íslenskir snafsar og borðaður þorramatur að sjálfsögðu.
Í janúar fengum við nefnilega heimsókn frá Kalla bróður og Þorgeiri. Þeir eru körfuboltabullur og ákváðu að hvíla sig aðeins milli leikja hjá okkur. Það var rosalega gaman að fá þá, við gátum aðeins sýnt þeim bæinn, verslað smá og fengið okkur gott að borða. Svo héldu þeir ferð sinni áfram að hvetja hetjur körfuboltaheimsins en þeir fóru á leiki í Chicago, Boston og New York.
Þeir feðgar tóku með sér smá súrmat og tilheyrandi í töskunni þannig að blótið yrði sem almennilegast hjá okkur og þökkum við þeim kærlega fyrir.
Setti inn nýjar myndir.

2007-02-05T09:31:00.000-06:00

......... var að setja inn myndir frá heimsókn mömmu, við fórum til Chicago, á norðurpólinn, í þakkargjörðarboð og svo bara rúnt um sveitirnar ásamt því að vera heima og pusla, lesa eða bara ekki neitt. Það var mjög gaman að fá hana og drengirnir allir ofsalega glaðir. Við bíðum spennt eftir næstu heimsókn.

2007-02-02T08:55:00.000-06:00

I byrjun ársins fór ég í heimsókn til Ingibjargar Hauks vinkonu minnar sem búsett er í Orange County, O.C. Það var alveg ótrúlega gaman og gott frí. Við tókum einn dag í að túristast og skoðuðum Hollywood, Beverly Hills, Rodeo Drive og margt fleira því Los Angeles er alveg ótrúlega stór borg......

Ég er búin að setja inn myndir frá þessum ágæta degi:)

2007-01-29T16:54:00.000-06:00

jæja nú hef ég verið aðeins duglegri og náð að setja inn nokkrar myndir. Þetta eru myndir frá því við komum hingað fyrst, ekkert sérstakt tilefni endilega, bara svona um daginn og veginn. Svo eru líka myndir frá afmæli Hallgríms og þegar við fórum í eplaleiðangur.
Annars hafa allir það ósköp gott. H og B eru í skólanum og Hari líka, ég og litlu herrarnir erum bara að gera það sem okkur langar í það skiptið, ósköp notalegt, um leið og við sinnum skilduverkum húsmóðurinnar.
Hér er ansi kalt þessa dagana, -18 gráður á morgnana en hlýnar aðeins yfir daginn.
Segjum þetta gott í bili, vona að ykkur líki framlagið, þið sem nennið að skoða:)

Nýbúinn

2006-12-05T23:22:00.000-06:00

jæja þá er best að reyna þetta. Það eru fjórir mánuðir síðan ég kom hingað með alla fjölskylduna og við höfum bara aðlagast ágætlega. Húsið er alveg frábært og staðsetningin líka. Tvípískt suburb... Íslendingarnir á staðnum hafa reynst okkur alveg einstaklega vel.

B og H eru svo duglegir í skólanum og á kafi í fótboltanum, tölvunni og sjónvarpinu að það þarf ekki að hafa áhyggjur af þeim. Þeir litlu eru ansi hamingjusamir þessa dagana þar sem amma er í heimsókn og þá þarf manni ekki að leiðast. Ömmur hafa nefnilega endalausa þolinmæði fyrir hinum ótrúlegustu leikjum:) Á meðan getur mamman leikið sér aðeins í tölvunni og prófað að blogga hmm eða allavega sett myndir á netið fyrir vini og fjölskyldur á Íslandinu góða.